ព័ត៌មានតាមបណ្តារខេត្ត

បាត់ដំបង៖ ក្រុមការងារជំនាញនៃមន្ទីររ៉ែ និងថាមពលខេត្តបាត់ដំបង កាលពីថ្ងៃទី៦ ខែវិច្ឆិកា ឆ្នាំ២០២៦ បានចុះត្រួតពិនិត្យទីតាំងកាយដីជើងភ្នំមួយកន្លែង ស្ថិតនៅភូមិអន្លង់ស្វាយ ឃុំតាគ្រាម ស្រុកបាណន់ ខេត្តបាត់ដំបង ដែលជាកម្មសិទ្ធិរបស់លោក មុត សារូត និងបានណែនាំឱ្យបញ្ឈប់សកម្មភាព ព្រមទាំងរៀបចំផាកពិន័យចូលថវិការដ្ឋតាមនីតិវិធី។

បាត់ដំបង៖ ក្រុមការងារជំនាញនៃមន្ទីររ៉ែ និងថាមពលខេត្តបាត់ដំបង បានចុះត្រួតពិនិត្យ និងផ្អាកសកម្មភាពទីតាំងអាជីវកម្មមួយកន្លែងរបស់លោក ជា បញ្ញា ដែលបានប្រើប្រាស់គ្រឿងចក្រកាយបកដីស្រែ ស្ថិតនៅភូមិអូរអណ្ដូង ឃុំត្រែង ស្រុករតនមណ្ឌល ខេត្តបាត់ដំបង កាលពីថ្ងៃទី៥ ខែវិច្ឆិកា ឆ្នាំ២០២៦។

បាត់ដំបង៖ មន្ទីររ៉ែ និងថាមពលខេត្តបាត់ដំបង បានចុះផ្អាកសកម្មភាពទាំងស្រុងរបស់ទីតាំងកាយដីក្រហមមួយកន្លែង របស់លោក ព្រឿង លីណា ស្ថិតនៅភូមិដូនត្រឹក ឃុំតាសាញ ស្រុកសំឡូត ខេត្តបាត់ដំបង ដោយពុំមានច្បាប់អនុញ្ញាត កាលពីថ្ងៃទី៥ ខែវិច្ឆិកា ឆ្នាំ២០២៦។

បាត់ដំបង៖ ក្រុមការងាររដ្ឋបាលក្រុងបាត់ដំបង កាលពីព្រឹកថ្ងៃទី៥ ខែវិច្ឆិកា ឆ្នាំ២០២៦ បានចុះត្រួតពិនិត្យការរៀបចំសណ្តាប់ធ្នាប់ អនាម័យ និងសោភ័ណភាពបរិស្ថាននៅសួនតេជោសន្តិភាព ដើម្បីធានាបាននូវភាពស្អាត របៀបរៀបរយ និងបរិយាកាសល្អសម្រាប់សាធារណជន។

បាត់ដំបង៖ លោកស្រី មាស ភិរុណ អនុប្រធានមន្ទីរអប់រំ យុវជន និងកីឡាខេត្តបាត់ដំបង បានអញ្ជើញចូលរួមកិច្ចប្រជុំបូកសរុបវឌ្ឍនភាពស្តីពីការបង្រៀនមុខវិជ្ជាអប់រំជំងឺមិនឆ្លង សម្រាប់ឆ្នាំសិក្សា ២០២៦-២០២៧ និងពិភាក្សារៀបចំផែនការបន្ត ដើម្បីលើកកម្ពស់គុណភាពនៃការអនុវត្តកម្មវិធីឱ្យកាន់តែមានប្រសិទ្ធភាពថែមទៀត មុនពេលបញ្ចប់គម្រោង។

បាត់ដំបង៖ ក្នុងគោលបំណងចូលរួមលើកកម្ពស់អនាម័យ និងបរិស្ថានរស់នៅឱ្យកាន់តែល្អប្រសើរ ជាពិសេសក្នុងបរិវេណគ្រឹះស្ថានសិក្សា មន្ទីរបរិស្ថានខេត្តបាត់ដំបង បាននាំយកធុងសំរាមប្រគល់ជូនមន្ទីរអប់រំ យុវជន និងកីឡាខេត្តបាត់ដំបង ដើម្បីបន្តចែកចាយដល់គ្រប់សាលាបឋមសិក្សា និងមធ្យមសិក្សាទូទាំងខេត្ត។

បាត់ដំបង៖ ក្រសួងផែនការ បានរៀបចំពិធីប្រកាសផ្សព្វផ្សាយលទ្ធផលបឋមផលិតផលក្នុងស្រុកសរុប (GDP) របស់ខេត្តបាត់ដំបង ក្រោមអធិបតីភាព ឯកឧត្តម រិន វីរៈ រដ្ឋលេខាធិការក្រសួងផែនការ និងជាប្រធានក្រុមប្រឹក្សាភិបាលនៃវិទ្យាស្ថានជាតិស្ថិតិ ឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលខេត្តបាត់ដំបង កាលពីថ្ងៃទី៥ ខែវិច្ឆិកា ឆ្នាំ២០២៦ នៅសាលប្រជុំសាលាខេត្តបាត់ដំបង។

បាត់ដំបង៖ គិតត្រឹមថ្ងៃទី៤ ខែវិច្ឆិកា ឆ្នាំ២០២៦ ស្ថានភាពទឹកនៅតាមអាងទឹក និងទំនប់បង្ហៀរសំខាន់ៗក្នុងខេត្តបាត់ដំបង មានកម្រិតទឹកពេញគ្រប់គ្រាន់ ខណៈអាងទឹកមួយចំនួនទៀតកំពុងបន្តស្តុកទឹកបន្ថែម ដើម្បីធានាការផ្គត់ផ្គង់ទឹកសម្រាប់ការបង្កបង្កើនផលរបស់ប្រជាកសិករ។ នេះបើតាមការបញ្ជាក់របស់មន្ទីរធនធានទឹក និងឧតុនិយមខេត្តបាត់ដំបង។

បាត់ដំបង៖ លោក ហ៊ុន ធឿន អភិបាលនៃគណៈអភិបាលស្រុកសំឡូត ខេត្តបាត់ដំបង បានដឹកនាំក្រុមការងាររដ្ឋបាលស្រុក ជួបពិភាក្សា និងសម្ភាសន៍ជាមួយគណៈប្រតិភូនៃលេខាធិការដ្ឋានកិច្ចការព្រំដែន ដឹកនាំដោយឯកឧត្តម សុំ សុខម្លូ រដ្ឋលេខាធិការនៃលេខាធិការដ្ឋានកិច្ចការព្រំដែន ដើម្បីផ្តល់ទិន្នន័យសម្រាប់ការសិក្សាបុរេសមិទ្ធិលទ្ធភាព ក្នុងការរៀបចំគម្រោងអភិវឌ្ឍន៍សាកល្បងនៅតំបន់ព្រំដែន។

បាត់ដំបង៖ ឯកឧត្តម ឆឹម សំអ៊ែល ប្រធានអង្គភាពត្រួតពិនិត្យ វាយតម្លៃ និងព័ត៌មាន និងជាប្រធានគ្រប់គ្រងគម្រោងគណនេយ្យភាពសង្គម នៃលេខាធិការដ្ឋាន គ.ជ.អ.ប. បានដឹកនាំគណៈប្រតិភូជាតិ និងអន្តរជាតិ ចុះបំពេញបេសកកម្មគាំទ្រការអនុវត្តគម្រោងលើកទី១២ របស់ធនាគារពិភពលោក (World Bank) ស្តីពីគម្រោងគណនេយ្យភាពសង្គម នៅឃុំខ្នាចរមាស ស្រុកបវេល ខេត្តបាត់ដំបង នាថ្ងៃទី៤ ខែវិច្ឆិកា ឆ្នាំ២០២៦។

បាត់ដំបង៖ បន្ទាប់ពីស្ថានភាពទឹកជំនន់បានស្រកផុតទៅ បញ្ហាប្រឈមមួយចំនួនដែលប្រជាពលរដ្ឋក្នុងខេត្តបាត់ដំបងជួបប្រទះ គឺបញ្ហាសុខភាពសាធារណៈ និងអនាម័យបរិស្ថាន។ រហូតមកដល់ពេលនេះ ការស្តារ និងប្រមូលសម្រាមតាមទីប្រជុំជន សម្រេចបាន ១០០% ហើយ។ នេះបើតាមការបញ្ជាក់របស់មន្ត្រីរដ្ឋបាលក្រុងបាត់ដំបង នាថ្ងៃទី៤ ខែវិច្ឆិកា ឆ្នាំ២០២៦។

ឯកឧត្តម សុខ លូ អភិបាល នៃគណៈអភិបាលខេត្តបាត់ដំបងបានអញ្ជើញទទួលជួបសម្តែងការគួរសម និងពិភាក្សាការងារ ជាមួយប្រតិភូក្រុមហ៊ុន អាស៊ាន ហ្គេតវេ ខបភើរ៉េសិន (Asian Gateway Corporation) ដើម្បីបង្ហាញអំពីគម្រោងសួនឧស្សាហកម្មស្រូវអង្ករខេត្តបាត់ដំបង និងការពិភាក្សាលើអនុស្សរណៈនៃការយោគយល់គ្នារវាងរដ្ឋបាលខេត្តបាត់ដំបង និង ក្រុមហ៊ុន Asian Gateway Corporation នាពេលខាងមុខ នៅសាលាប្រជុំសាលាខេត្តបាត់ដំបង នារសៀលថ្ងៃទី៤ ខែវិច្ឆិកា ឆ្នាំ២០២៦។