(ប៉ៃលិន)៖ រដ្ឋមន្ត្រីក្រសួងពាណិជ្ជកម្ម ថ្លែងថា ខេត្តប៉ៃលិន ជាខេត្តដែលមានសក្ដានុពលខ្ពស់លើវិស័យកសិ-ពាណិជ្ជកម្ម ឧស្សាហកម្ម ទេសចរណ៍ និងពាណិជ្ជកម្ម ជាពិសេសផលិតផលកសិកម្មសក្ដានុពល ដូចជា មៀនប៉ៃលិន ពោតក្រហម និងដំឡូងមី ដែលអាចបន្តលើកកម្ពស់ការកែច្នៃ បង្កើនតម្លៃបន្ថែម និងពង្រីកទីផ្សារនាំចេញទៅកាន់ទីផ្សារអន្តរជាតិ។

ប៉ៃលិន៖ នៅមន្ទីរពាណិជ្ជកម្មខេត្តប៉ៃលិន ថ្ងៃទី២៧ ខែកក្កដា ឆ្នាំ២០២៦ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានអញ្ជើញជាអធិបតីក្នុងពិធីសំណេះសំណាលជាមួយថ្នាក់ដឹកនាំ និងមន្ត្រីរាជការនៃមន្ទីរពាណិជ្ជកម្ម និងសាខា ក.ប.ប. ខេត្តប៉ៃលិន និងបាត់ដំបង ដើម្បីពិនិត្យវឌ្ឍនភាពការងារ ផ្តល់ទិសដៅអនុវត្តការងារ និងលើកទឹកចិត្តដល់មន្ត្រីរាជការឱ្យបន្តបំពេញតួនាទីប្រកបដោយស្មារតីទទួលខុសត្រូវខ្ពស់ ក្នុងការអភិវឌ្ឍវិស័យពាណិជ្ជកម្មនៅថ្នាក់ក្រោមជាតិ។

សហគ្រាសធុនតូច និងមធ្យម (SME) គឺជាចលករយ៉ាងសំខាន់ក្នុងការជំរុញកំណេីនសេដ្ឋកិច្ចជាតិ និងបង្កើតការងារសម្រាប់ប្រជាពលរដ្ឋ។ រាជរដ្ឋាភិបាលជាច្រើនអាណត្តិមកហើយ ក៏បានដាក់ចេញនូវគោលនយោបាយ និងវិធានការជាបន្តបន្ទាប់ដើម្បីជំរុញ និងលើកស្ទួយការអភិវឌ្ឍន៍វិស័យ SME ហើយរាជរដ្ឋាភិបាល និតិកាលទី៧ នៃរដ្ឋសភា ក៏បានដាក់ចេញនូវវិធានបន្ថែមជាបន្តបន្ទាប់ ដើម្បីលើកទឹកចិត្ត ក៏ដូចជាជួយសម្រួលដល់ការបង្កើតនិងដំណើរការរបស់ SME។

ស្រាមៀនប៉ៃលិន ស្រាទំពាំងបាយជូព្រៃ ស្រាកំរើករាត្រី គឺជាផលិតផលរបស់សិប្បករខ្មែរ រស់នៅក្នុងភូ​មិតាង៉ែនលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន។ មានគុណភាពល្អ ជំនួយសុខភាពអ្នកប្រើប្រាស់ និងត្រូវបានទទួលស្គាល់ជាផលិតផល ភូមិមួយ ផលិតផលមួយ របស់ប្រទេសកម្ពុជា។

ក្នុងកិច្ចប្រជុំវាយតម្លៃ តាមរយៈប្រព័ន្ធអនឡាញ (ZOOM) នាព្រឹកថ្ងៃទី ០២ ខែកក្កដា ឆ្នាំ២០២៦ នៅសាលាខេត្តប៉ៃលិន ស្រាទំពារបាយជូរព្រៃ និង ស្រាកំរើករាត្រី របស់លោក វួច ធុច សិប្បកររស់នៅភូមិតាង៉ែនក្រោម សង្កាត់ប៉ៃលិន ក្រុងប៉ៃលិន ខេត្តប៉ៃលិន ត្រូវបានទទួលស្គាល់ ជាផលិតផល«ភូមិមួយ ផលិតផលមួយ» នៃគណៈកម្មាធិការជាតិ ជំរុញចលនាភូមិមូយ ផលិតផលមួយ។ ការទទួលស្គាល់នេះ គឺ បន្ទាប់ពីអង្គប្រជុំបានពិនិត្យពិភាក្សា និងវាយតម្លៃ ទៅលើគុណភាព បទដ្ឋានបច្ចេកទេស និងលក្ខខណ្ឌវិនិច្ឆ័យនានា ព្រមទាំងការពន្យល់យ៉ាងក្បោះក្បាយពីសង្វាក់ផលិតកម្ម វត្ថុធាតុដើម និងគុណភាព ពីលោក វួច ធុច ដែលជាម្ចាស់ផលិតផល។